زیادہ نمک کا استعمال ہارٹ فیل کا خطرہ بڑھا دیتا ہے، نئی تحقیق میں انتباہ

ماہرین صحت نے خبردار کیا ہے کہ نمک کا زیادہ استعمال نہ صرف بلند فشار خون کا باعث بنتا ہے بلکہ دل کی ناکامی کے خطرے میں بھی نمایاں اضافہ کر سکتا ہے۔

وینڈربلٹ یونیورسٹی کے محققین کی جانب سے کی گئی ایک نئی تحقیق میں انکشاف ہوا ہے کہ زیادہ سوڈیم کا استعمال خاص طور پر حساس افراد میں دل کی بیماریوں کا براہ راست سبب بن سکتا ہے۔

یہ تحقیق ایک طبی جریدے میں شائع ہوئی جس میں امریکا کے جنوب مشرقی علاقوں سے تعلق رکھنے والے پچیس ہزار سے زائد افراد کا جائزہ لیا گیا۔

تحقیق کے مطابق شرکاء اوسطاً تجویز کردہ مقدار سے تقریباً دو گنا زیادہ نمک استعمال کر رہے تھے، جس کے نتیجے میں دل کی نئی بیماری کے خطرے میں پندرہ فیصد تک اضافہ دیکھا گیا۔

ماہرین کے مطابق روزانہ نمک کے استعمال میں ہر اضافی ایک ہزار ملی گرام دل کی ناکامی کے خطرے میں آٹھ فیصد اضافہ کر سکتا ہے، چاہے دیگر عوامل جیسے موٹاپا، کولیسٹرول یا بلند فشار خون کو مدنظر ہی کیوں نہ رکھا جائے۔

ماہرین نے اس بات پر زور دیا کہ نمک کے استعمال میں معمولی کمی بھی دل کی بیماریوں کے خطرات کو کم کرنے میں مددگار ثابت ہو سکتی ہے۔