ایل پی جی کی قیمتیں بے قابو ، 500 روپے فی کلو تک فروخت جاری

ملک بھر میں ایل پی جی کی قیمتوں میں بے قابو اضافہ دیکھنے میں آ رہا ہے، جہاں سرکاری نرخ 310 روپے فی کلو مقرر ہونے کے باوجود گیس 450 سے 500 روپے فی کلو تک فروخت کی جا رہی ہے۔

گیس کی قلت کے باعث سلینڈر استعمال کرنے والے شہری شدید مشکلات کا شکار ہیں، جبکہ گھریلو صارفین کے اخراجات میں بھی نمایاں اضافہ ہو گیا ہے۔

آئل اینڈ گیس ریگولیٹری اتھارٹی نے مہنگی ایل پی جی فروخت کرنے والوں کے خلاف سخت کارروائی کا عندیہ دیتے ہوئے اعلان کیا ہے کہ زائد قیمت وصول کرنے والے ڈیلرز اور دکانداروں کے خلاف آج سے آپریشن شروع کیا جائے گا۔

دوسری جانب چیئرمین ایل پی جی ڈسٹری بیوٹرز عبدالہادی خان کا کہنا ہے کہ مارکیٹ میں سپلائی کم ہے اور ڈسٹری بیوٹرز کو ایل پی جی مہنگے داموں مل رہی ہے، جس کی وجہ سے قیمتوں میں اضافہ ہوا۔

انہوں نے مزید کہا کہ متعلقہ ادارے اور درآمد کنندگان زائد قیمت پر فروخت روکنے میں مؤثر کردار ادا کرنے میں ناکام رہے ہیں۔