اماراتی مالیاتی ذخائر کی واپسی معمول کی کارروائی ہے،غلط رنگ دیناگمراہ کن ہے، دفترخارجہ

پاکستان نے متحدہ عرب امارات کے مالی ذخائر سے متعلق گمراہ کن تبصرے مسترد کر دیے۔ ترجمان دفترخارجہ کی جانب سے جاری بیان کے مطابق یو اے ای کے مالی ذخائر سے متعلق حالیہ تبصرے بے بنیاد اور حقیقت کے منافی ہیں۔ ذخائر کی واپسی ایک معمول کی مالیاتی کارروائی ہے، اسے غلط رنگ دینا گمراہ کن ہے۔

ترجمان دفترخارجہ کاکہناتھاکہ سٹیٹ بینک میں رکھے گئے ذخائر دو طرفہ تجارتی معاہدوں کا حصہ اور پاکستان کے معاشی استحکام کے لیے مضبوط حمایت کا مظہرہیں۔حکومتِ پاکستان طے شدہ شرائط کے مطابق مدت پوری ہونے پر ذخائر واپس کر رہی ہے۔

دفترخارجہ نے کہاکہ پاکستان اور یو اے ای کے درمیان دیرینہ اور برادرانہ تعلقات قائم ہیں، تجارت، سرمایہ کاری اور دفاع سمیت مختلف شعبوں میں اسٹریٹجک تعاون جاری ہے اورپاکستانی عوام باہمی  دوستی کے قیام میں شیخ زاید بن سلطان النہیان کے کردار کو قدر کی نگاہ سے دیکھتے ہیں۔  پاکستان متحدہ عرب امارات کے ساتھ مضبوط تعلقات کو مزید فروغ دینے کے عزم پر قائم ہے۔