آزادکشمیر اور گلگت بلتستان میں ڈیجیٹل انقلاب کا آغاز

اسپیشل کمیونیکیشن آرگنائزیشن (ایس سی او) نے آزاد جموں و کشمیر اور گلگت بلتستان میں 100 جدید آئی ٹی مراکز قائم کرکے خطے میں ڈیجیٹل انقلاب کی بنیاد رکھ دی ہے۔ پاکستان کی عسکری قیادت اور ڈی جی ایس سی او کی وژنری رہنمائی میں آزاد کشمیر تیز رفتار ترقی کے نئے دور میں داخل ہو رہا ہے ایس سی او کے آئی ٹی منصوبوں سے مظفرآباد، باغ، بھمبر، ڈڈیال، کوٹلی، میرپور، راولاکوٹ اور ہجیرہ کے ہزاروں نوجوان جدید ٹیکنالوجی سے مستفید ہو رہے ہیں۔ سافٹ ویئر ٹیکنالوجی پارکس اور فری لانسنگ ہب نوجوانوں کی معاشی، ڈیجیٹل اور ٹیکنالوجیکل خود مختاری کے مضبوط ذرائع بن چکے ہیں۔ دور دراز 49 علاقوں میں قائم فری لانسنگ ہبز نوجوانوں کے لیے ہنر سیکھنے اور روزگار کے نئے مواقع پیدا کر رہے ہیں۔ مظفرآباد میں پاکستان کے پہلے خواتین سافٹ ویئر ٹیکنالوجی پارک کا قیام خواتین کے بااختیار ہونے کی اہم علامت قرار دیا جا رہا ہے۔ ایس سی او نے خصوصی افراد کے لیے خصوصی فری لانسنگ ہب بھی قائم کیا ہے، جب کہ ان کے لیے مفت خصوصی گاڑی کی فراہمی ادارے کے سماجی شمولیت کے عملی عزم کی نمایاں مثال ہے۔ سافٹ ویئر پارکس اور آئی ٹی ہبز میں تیز رفتار انٹرنیٹ، جدید انفراسٹرکچر اور 24 گھنٹے بجلی کی فراہمی کو یقینی بنایا گیا ہے۔ آزاد کشمیر میں 400 سے زائد نوجوان براہِ راست ان منصوبوں سے فائدہ اٹھا رہے ہیں، جب کہ 500 سے زیادہ فری لانسرز اپنی محنت سے خود کفیل ہو کر ملکی معیشت کو مضبوط بنا رہے ہیں۔ ایس سی او کے ان منصوبوں سے 20 ملین ڈالر سے زائد آمدن حاصل ہو چکی ہے، جو پاکستان کی ڈیجیٹل خود انحصاری کے نئے دور کا آغاز قرار دی جا رہی ہے۔