عدالتی فیصلے کے بعد میشا شفیع نے اپنے خیالات کا اظہار کر دیا

لاہور: پاکستانی گلوکارہ میشا شفیع نے علی ظفر کے خلاف دائر ہتکِ عزت کے مقدمے کا حتمی فیصلہ آنے کے بعد سوشل میڈیا کا سہارا لیتے ہوئے اپنے خیالات مداحوں کے ساتھ بانٹے ہیں۔ انسٹاگرام پر شیئر کی گئی مختلف اسٹوریز میں میشا شفیع نے خواتین کے حوصلے، ہمت اور خود مختاری سے متعلق شاعری پوسٹ کی، جو ان کی موجودہ ذہنی کیفیت کی عکاسی کرتی ہے۔

میشا شفیع کا کہنا تھا کہ وہ اس مشکل مرحلے کو ایک ذاتی صدمہ سمجھتی ہیں اور اب اپنی تمام تر توانائی خود کو سنبھالنے اور زندگی میں آگے بڑھنے پر صرف کریں گی۔ انہوں نے واضح کیا کہ ان کے نزدیک سچائی پر قائم رہنا ہی سب سے بڑی فتح ہے۔ یاد رہے کہ یہ تنازع 2018 میں شروع ہوا تھا جب میشا شفیع نے علی ظفر پر ہراسانی کے الزامات عائد کیے تھے، جس کے جواب میں علی ظفر نے ہتکِ عزت کا دعویٰ دائر کیا تھا۔ عدالت نے طویل سماعتوں کے بعد علی ظفر کو کامیاب قرار دیتے ہوئے میشا شفیع کو 50 لاکھ روپے ہرجانہ ادا کرنے کا حکم دیا ہے۔