امریکی اسرائیلی حملے میں زخمی ایران کے سابق وزیر خارجہ کمال خرازی شہید ہو گئے

تہران: ایران کے سابق وزیر خارجہ اور سٹریٹجک کونسل برائے خارجہ امور کے سربراہ ڈاکٹر کمال خرازی زخموں کی تاب نہ لاتے ہوئے انتقال کر گئے ہیں۔ ایرانی ذرائع کے مطابق، تہران میں واقع ان کے گھر کو امریکہ اور اسرائیل کی جانب سے نشانہ بنایا گیا تھا، جس میں ان کی اہلیہ موقع پر ہی جاں بحق ہو گئی تھیں جبکہ ڈاکٹر کمال خرازی شدید زخمی حالت میں اسپتال منتقل کیے گئے، جہاں وہ کئی روز تک کوما میں رہنے کے بعد دم توڑ گئے۔

81 سالہ کمال خرازی ایران کی اعلیٰ قیادت، بالخصوص مجتبیٰ خامنہ ای کے قریبی مشیر تھے اور اس سے قبل علی خامنہ ای کے بھی معتمد ساتھی رہ چکے تھے۔ انہوں نے 1997 سے 2005 تک صدر محمد خاتمی کے دور میں بطور وزیر خارجہ خدمات انجام دیں اور ایران کی عالمی سفارت کاری میں کلیدی کردار ادا کیا۔ وہ نہ صرف ایک منجھے ہوئے سفارت کار تھے بلکہ ایک ممتاز ماہرِ تعلیم اور کئی کتابوں کے مصنف بھی تھے۔

تجزیہ کاروں کا کہنا ہے کہ ڈاکٹر کمال خرازی پاکستان کے ساتھ جاری حالیہ حساس سفارتی رابطوں کی نگرانی بھی کر رہے تھے، اس لیے اس حملے کو خطے میں جاری امن کی کوششوں کو سبوتاژ کرنے کی ایک منظم کوشش قرار دیا جا رہا ہے۔