ایران جنگ پر صدر ٹرمپ کل امریکی قوم سے اہم خطاب کریں گے

واشنگٹن: وائٹ ہاؤس کی ترجمان کیرولین لیوٹ نے تصدیق کی ہے کہ صدر ڈونلڈ ٹرمپ کل اپنے شیڈول کے مطابق ایران جنگ پر ایک “اہم اپ ڈیٹ” دینے کے لیے قوم سے خطاب کریں گے۔ یہ خطاب پاکستانی وقت کے مطابق جمعرات کی صبح 6 بجے براہِ راست نشر کیا جائے گا۔صدر ٹرمپ نے اپنے حالیہ بیان میں واضح کیا ہے کہ امریکہ آئندہ 2 سے 3 ہفتوں کے اندر ایران سے نکل جائے گا۔ انہوں نے دو ٹوک الفاظ میں کہا کہ “امریکہ کو اپنی جنگ ختم کرنے کے لیے ایران کے ساتھ کسی ڈیل کی ضرورت نہیں، ڈیل ہو یا نہ ہو، ہم اس جنگ سے نکل رہے ہیں۔” تاہم انہوں نے یہ بھی اضافہ کیا کہ اگر ایرانی قیادت مذاکرات کی میز پر آتی ہے تو یہ ایک اچھا قدم ہوگا۔

سیاسی تجزیہ کاروں کا ماننا ہے کہ ٹرمپ کا یہ خطاب “امریکہ فرسٹ” پالیسی کے تحت مشرقِ وسطیٰ سے امریکی فوجی انخلاء کے حتمی اعلان پر مبنی ہو سکتا ہے۔ جہاں ایک طرف ایران پر شدید فضائی حملے جاری ہیں، وہیں صدر ٹرمپ کی جانب سے جنگ سے نکلنے کا اعلان خطے میں طاقت کے توازن کو مکمل طور پر بدل سکتا ہے۔