2سے 3 ہفتوں میں ایران جنگ سے نکل جائیں گے، امریکی صدر کا اعلان

امریکی صدر ڈونلڈ ٹرمپ نے اعلان کیا ہے کہ امریکا آئندہ دو سے تین ہفتوں میں ایران کے ساتھ جاری جنگ سے نکل جائے گا۔
وائٹ ہاؤس میں میڈیا سے گفتگو کرتے ہوئے انہوں نے دعویٰ کیا کہ ایران میں حکومتی تبدیلی ہوچکی ہے، تاہم یہ امریکا کا مقصد نہیں تھا بلکہ کارروائی کا اصل ہدف ایران کو جوہری ہتھیار حاصل کرنے سے روکنا تھا، جو حاصل کرلیا گیا ہے۔
امریکی صدر کا کہنا تھا کہ ممکن ہے جنگ کے خاتمے سے قبل ہی کوئی معاہدہ طے پا جائے، تاہم مذاکرات ضروری نہیں اور امریکا اپنی شرائط پر بھی کارروائی روک سکتا ہے۔
انہوں نے کہا کہ ایران آئندہ چار سے پانچ برس تک جوہری ہتھیار بنانے کے قابل نہیں ہوگا اور مستقبل میں بھی امریکا ایسے کسی اقدام کو برداشت نہیں کرے گا۔
صدر ٹرمپ کے مطابق ایران کو دوبارہ بحالی میں پندرہ سے بیس سال لگ سکتے ہیں جبکہ وہاں کی فوجی اور قیادی صلاحیتیں شدید متاثر ہوچکی ہیں۔
انہوں نے آبنائے ہرمز سے متعلق کہا کہ دیگر ممالک کو اپنی سلامتی خود یقینی بنانا ہوگی اور امریکا ہر صورت میں ان کا دفاع کرنے کا پابند نہیں۔
اس سے قبل ایک امریکی اخبار کو دیے گئے انٹرویو میں بھی انہوں نے کہا تھا کہ امریکا زیادہ عرصہ ایران میں موجود نہیں رہے گا اور اس کے انخلا کے بعد آبنائے ہرمز خود ہی کھل جائے گی۔