’شوگر ڈیڈی سے فائدہ اٹھائیں‘ بیان پر مشی خان زینب یوسف پر بھڑک اٹھیں

کراچی: پاکستان شوبز انڈسٹری کی سینئر اداکارہ اور بے باک میزبان مشی خان نے سوشل میڈیا پر تیزی سے پھیلنے والے ‘شوگر ڈیڈی’ کے تصور اور اس سے متعلق پوڈ کاسٹ میں دی جانے والی گفتگو پر سخت برہمی کا اظہار کیا ہے۔ مشی خان نے اپنے انسٹاگرام اکاؤنٹ پر ایک ویڈیو پیغام شیئر کرتے ہوئے زینب یوسف کے ایک حالیہ پوڈ کاسٹ کو ہدفِ تنقید بنایا، جس میں مبینہ طور پر لڑکیوں کو شوگر ڈیڈی کے ساتھ تعلقات استوار کرنے کے حوالے سے مشورے دیے گئے تھے۔

اداکارہ نے اس طرح کی گفتگو کو “غیر اخلاقی” اور معاشرے کے لیے “انتہائی نقصان دہ” قرار دیتے ہوئے کہا کہ پوڈ کاسٹس میں ایسے موضوعات کو جگہ دینا جن میں اخلاقی اقدار کی دھجیاں اڑائی جا رہی ہوں، ایک خطرناک رجحان ہے۔ مشی خان کا کہنا تھا کہ حقیقت میں لڑکیاں شوگر ڈیڈی نہیں رکھتیں بلکہ ایسے مرد ان لڑکیوں کو وقتی طور پر استعمال کرتے ہیں، جس کا انجام ہمیشہ لڑکیوں کے لیے مالی اور ذہنی مسائل کی صورت میں نکلتا ہے۔

انہوں نے افسوس کا اظہار کیا کہ ویوز کی خاطر ایسے افراد کو پلیٹ فارم مہیا کیا جا رہا ہے جو نوجوان نسل کو گمراہ کر رہے ہیں۔ مشی خان نے والدین اور نوجوان لڑکیوں کو خبردار کیا کہ وہ اس طرح کے پرکشش نظر آنے والے مگر کھوکھلے تعلقات کے جال میں نہ پھنسیں، کیونکہ یہ نہ صرف ان کی عزتِ نفس بلکہ ان کے مستقبل کے لیے بھی تباہ کن ثابت ہو سکتے ہیں۔