وائٹ ہاؤس کی جنگ کے باوجود ایرانی ٹیم کے استقبال اور سکیورٹی کی یقین دہانی

وائٹ ہاؤس نے رواں سال امریکا میں منعقد ہونے والے فیفا ورلڈ کپ کے دوران ایرانی فٹ بال ٹیم کو مکمل تحفظ فراہم کرنے اور ان کا پرتپاک خیرمقدم کرنے کی باضابطہ یقین دہانی کروا دی ہے۔ وائٹ ہاؤس کی ورلڈ کپ ٹاسک فورس کے سربراہ اینڈریو جیولیانی نے ٹیکساس میں ایک کانفرنس کے دوران میڈیا سے گفتگو کرتے ہوئے کہا کہ دونوں ممالک کے درمیان جاری تناؤ کے باوجود امریکا ایرانی ٹیم کی شرکت کا منتظر ہے، کیونکہ یہ امریکا میں مقیم ایرانی نژاد باشندوں کے لیے اپنی ٹیم کی حوصلہ افزائی کا ایک بہترین موقع ہوگا۔

میڈیا رپورٹس کے مطابق ایرانی ٹیم کے گروپ مرحلے کے اہم میچز لاس اینجلس اور سیاٹل میں شیڈول ہیں۔ دوسری جانب، صورتحال اس وقت پیچیدہ ہوگئی جب ایران کی وزارتِ کھیل نے اپنے قومی کھلاڑیوں اور ٹیموں کو امریکا میں ہونے والے مقابلوں میں شرکت سے روک دیا ہے۔ اس سے قبل امریکی صدر ڈونلڈ ٹرمپ نے بھی سوشل میڈیا پر ایرانی ٹیم کی امریکا آمد کے حوالے سے ان کی جان و مال کی حفاظت پر خدشات کا اظہار کیا تھا، جس نے سفارتی حلقوں میں بحث چھیڑ دی تھی۔

ایران نے سیکیورٹی خدشات کے پیشِ نظر عالمی فٹ بال تنظیم فیفا (FIFA) سے اپنے میچز میکسیکو منتقل کرنے کی باضابطہ درخواست کی تھی، تاہم فیفا نے اس درخواست کو مسترد کرتے ہوئے واضح کیا ہے کہ میچز شیڈول کے مطابق امریکا میں ہی ہوں گے۔ وائٹ ہاؤس کی جانب سے اب اس معاملے کو حل کرنے کے لیے سیکیورٹی کے سخت ترین انتظامات کا وعدہ کیا گیا ہے تاکہ کھیل کے میدان کو سیاست سے پاک رکھا جا سکے۔