مون سون میں کسی بھی جانی و مالی نقصان سے بچنے کیلئے ابھی سے تیاری کی ہدایت

وزیرِ اعظم محمد شہباز شریف کی زیرِ صدارت موسمیاتی تبدیلی کے مضر اثرات سے بچاؤ کے لیے حکومتی حکمتِ عملی پر جائزہ اجلاس آج اسلام آباد میں منعقد ہوا۔ اجلاس میں آئندہ برس مون سون کے دوران کسی بھی ممکنہ جانی یا مالی نقصان سے بچنے کے لیے پیشگی اقدامات پر غور کیا گیا۔
وزیرِ اعظم نے ہدایت کی کہ آئندہ مون سون کے نقصانات سے بچنے کے لیے ابھی سے جامع منصوبہ بندی کی جائے۔ انہوں نے وزارتِ موسمیاتی تبدیلی، وزارتِ منصوبہ بندی اور این ڈی ایم اے کو صوبائی حکومتوں کے ساتھ مل کر مربوط حکمتِ عملی تشکیل دینے کی ہدایت بھی جاری کی۔وزیرِ اعظم نے پانی کے بہتر انتظام کے لیے نیشنل واٹر کونسل کا اجلاس منعقد کرنے کی تیاری کا بھی حکم دیا، تاکہ قومی سطح پر جامع منصوبہ بندی کو مزید مؤثر بنایا جا سکے۔اجلاس کے دوران وزارتِ موسمیاتی تبدیلی کی جانب سے قلیل، وسط اور طویل مدتی منصوبوں پر تفصیلی بریفنگ پیش کی گئی۔ وزیرِ اعظم نے قلیل مدتی منصوبے کی منظوری دیتے ہوئے فوری عملدرآمد کا حکم دیا۔اس موقع پر وزیرِ اعظم کا کہنا تھا کہ پاکستان ایک ترقی پذیر ملک ہے اور ہر تیسرے سال موسمیاتی تبدیلی کے باعث جی ڈی پی کا بڑا حصہ متاثر ہوتا ہے۔ انہوں نے اس امر پر افسوس کا اظہار کیا کہ قیمتی اور محدود وسائل ترقیاتی منصوبوں کے بجائے موسمیاتی تبدیلی کے منفی اثرات سے نمٹنے پر خرچ کرنا پڑتے ہیں، جبکہ پاکستان کا عالمی سطح پر موسمیاتی تبدیلی میں کردار نہ ہونے کے برابر ہے۔اجلاس میں وفاقی وزراء احسن اقبال، احد خان چیمہ، محمد اورنگزیب، ڈاکٹر مصدق ملک، عطاء اللہ تارڑ اور دیگر متعلقہ اعلیٰ حکام نے شرکت کی۔ اجلاس کو آئندہ مون سون کے حوالے سے عالمی تخمینوں اور ممکنہ اثرات پر بھی بریفنگ دی گئی۔