یہود مخالف ماحول میں ملوث ہونے کا الزام، امریکا کا یونیورسٹی آف کیلیفورنیا پر مقدمہ

امریکی محکمہ انصاف نے یونیورسٹی آف کیلیفورنیا کے خلاف ایک بڑا قانونی قدم اٹھاتے ہوئے مقدمہ درج کرا دیا ہے، جس میں یونیورسٹی انتظامیہ پر کیمپس کے اندر یہود مخالف ماحول کو فروغ دینے یا اسے روکنے میں ناکامی کا الزام عائد کیا گیا ہے۔ اس سنگین الزام کے باوجود کیلیفورنیا یونیورسٹی کی انتظامیہ نے تاحال کوئی باضابطہ یا فوری ردعمل ظاہر نہیں کیا ہے۔

دوسری جانب، امریکی عدالت نے ٹرمپ انتظامیہ کو فی الحال یونیورسٹی پر کسی بھی قسم کا جرمانہ عائد کرنے سے روک دیا ہے۔ واضح رہے کہ ٹرمپ انتظامیہ کیمپس میں مبینہ یہود مخالف سرگرمیوں کو کنٹرول نہ کرنے پر یونیورسٹی کو بھاری جرمانہ کرنا چاہتی تھی۔ یہ قانونی کشیدگی ایک ایسے وقت میں سامنے آئی ہے جب رواں برس اگست میں بھی مظاہروں اور امن و امان کی صورتحال کے پیش نظر امریکا نے یونیورسٹی کی فنڈنگ روک دی تھی۔