واشنگٹن میں لاہور سے تعلق رکھنے والے پاکستانی نژاد امریکی کی تشدد زدہ لاش برآمد

واشنگٹن: رپورٹ کے مطابق واشنگٹن فائر اینڈ ایمرجنسی میڈیکل سروسز بدھ کو ایک گھر میں دھوئیں کی اطلاع پر پہنچی۔ فائر فائٹرز نے اپارٹمنٹ میں داخل ہو کر آگ بجھائی اور ایک شخص کو بے ہوش پایا۔

بعد ازاں، میٹروپولیٹن پولیس ڈیپارٹمنٹ نے مقتول کی شناخت 40 سالہ سید حماد حسین کے نام سے کی۔ پولیس کے مطابق مردہ شخص کے جسم پر زخموں کے نشانات پائے گئے۔

ابتدائی تفتیش کے بعد معاملہ پولیس کے حوالے کیا گیا، تاہم جمعہ تک کسی مشتبہ شخص کی شناخت نہیں ہو سکی۔ تفتیشی حکام پڑوس کی عمارت سے حاصل ہونے والی سیکیورٹی کیمرے کی فوٹیج کا جائزہ لے رہے ہیں۔

ذرائع نے بتایا کہ فوٹیج میں حماد حسین کو آگ لگنے سے کچھ دیر پہلے تین دیگر افراد کے ساتھ عمارت میں داخل ہوتے ہوئے دیکھا گیا، جن میں ممکنہ طور پر ایک خاتون بھی شامل تھی۔ بعد میں وہ افراد عمارت سے بھاگتے ہوئے بھی نظر آئے۔

پولیس نے عوام سے معلومات کی اپیل کی ہے اور قتل کے ذمہ داروں کی گرفتاری کے لیے $25,000 انعام کا اعلان کیا ہے۔

حماد حسین کا خاندان لاہور سے تعلق رکھتا ہے اور وہ واشنگٹن میں رہائش پذیر تھے۔ ان کی نماز جنازہ آج فالس چرچ، ورجینیا کے دار الحجرہ اسلامک سینٹر میں ادا کی جائے گی۔