صدر، وزیراعظم کا یوم سیاہ کشمیر پر کشمیریوں سے اظہار یکجہتی، شہداء کو خراج عقیدت پیش

صدر مملکت آصف علی زرداری اور وزیراعظم محمد شہباز شریف نے یومِ سیاہ کشمیر کے موقع پر کشمیری عوام سے بھرپور یکجہتی کا اظہار کرتے ہوئے کشمیری مرد، خواتین اور بچوں کی لازوال قربانیوں کو زبردست خراجِ عقیدت پیش کیا ہے۔

صدر مملکت آصف علی زرداری نے اپنے پیغام میں عالمی برادری پر زور دیا ہے کہ وہ جموں و کشمیر کے دیرینہ تنازع کے منصفانہ حل کے لیے اپنا فعال کردار ادا کرے۔ انہوں نے کہا کہ یہ دن کشمیری عوام کی منصفانہ جدوجہد کے حوالے سے ہماری غیر متزلزل حمایت کا اعادہ ہے، کیونکہ کشمیری آج بھی بدترین پابندیوں اور بنیادی حقوق سے محرومی کا سامنا کر رہے ہیں۔ انہوں نے عزم ظاہر کیا کہ پاکستان کشمیریوں کی اخلاقی، سفارتی اور سیاسی حمایت ہر سطح پر جاری رکھے گا۔

ادھر وزیراعظم محمد شہباز شریف نے اپنے پیغام میں کہا کہ 27 اکتوبر کا دن جموں و کشمیر کی تاریخ کے ایک انتہائی المناک باب کی یاد دلاتا ہے، اور 79 برس گزرنے کے باوجود کشمیری عوام اپنے پیدائشی حقِ خودارادیت سے محروم ہیں۔ وزیراعظم نے کشمیری عوام کی جرأت اور ثابت قدمی کو ان کے عزم و ہمت کا روشن ثبوت قرار دیتے ہوئے اس بات پر زور دیا کہ مسئلہ کشمیر کا حل اقوام متحدہ کی سلامتی کونسل کی قراردادوں کے عین مطابق ہونا چاہیے، کیونکہ اس منصفانہ اور پرامن حل کے بغیر جنوبی ایشیا میں پائیدار امن کا قیام ناممکن ہے