روس کے شہر وورونژ پر یوکرین کا بڑا ڈرون حملہ، 3 افراد ہلاک، 39 زخمی

یوکرین کے روسی شہر وورونژ (Voronezh) اور اس کے گردونواح پر ہونے والے بڑے پیمانے پر ڈرون حملوں کے نتیجے میں 3 افراد ہلاک اور 39 زخمی ہوگئے ہیں، جبکہ متعدد صنعتی تنصیبات، رہائشی عمارتوں اور دیگر مقامات پر شدید آگ بھڑک اٹھی۔

روسی حکام کے مطابق یوکرینی مسلح افواج نے 26 اکتوبر کی رات اور صبح کے دوران وورونژ ریجن کو ڈرون حملوں کا نشانہ بنایا۔ روسی فضائی دفاعی نظام نے مجموعی طور پر 113 یوکرینی ڈرونز تباہ کرنے کا دعویٰ کیا ہے، جن میں سے 70 سے زائد صرف وورونژ شہر کی فضائی حدود میں مار گرائے گئے۔ وورونژ ریجن کے گورنر الیگزینڈر گوسیف نے حملوں سے ہونے والے جانی و مالی نقصان کی تصدیق کی ہے، جبکہ علاقائی وزارتِ صحت کے مطابق زخمی ہونے والے 39 افراد میں سے 2 کی حالت تشویشناک ہے۔

حملوں کے دوران گرنے والے ڈرونز کا ملبہ ایک مسافر ٹرین پر بھی آ گرا، جس کے نتیجے میں اس میں سوار متعدد مسافر زخمی ہوگئے۔ حملوں کی زد میں آکر مختلف صنعتی تنصیبات، ایک کاروباری مرکز، رہائشی اپارٹمنٹ کی عمارت اور ایک اسکول کے اسٹیڈیم سمیت کئی مقامات پر آگ لگ گئی۔ گورنر الیگزینڈر گوسیف نے علاقائی حکومت کے اجلاس کا آغاز حملوں میں جاں بحق ہونے والے افراد کی یاد میں ایک منٹ کی خاموشی سے کیا اور متاثرہ خاندانوں سے گہرے دکھ اور تعزیت کا اظہار کیا۔