نارووال میں پاک چین ہاکی میچ، احسن اقبال کا کھیلوں کی سرگرمیوں کی بحالی پر اظہارِ مسرت

وفاقی وزیر برائے منصوبہ بندی احسن اقبال نے کہا ہے کہ اپنے آبائی حلقے نارووال میں پاکستان اور چین کی ہاکی ٹیموں کو ایک ساتھ کھیلتا دیکھ کر وہ اپنے جذبات الفاظ میں بیان نہیں کر سکتے۔

نارووال میں میڈیا سے گفتگو کرتے ہوئے احسن اقبال کا کہنا تھا کہ خطے میں ہاکی کی دوبارہ واپسی، کھیلوں کے میدانوں کی رونقیں بحال ہونے اور نوجوانوں کی کھیلوں میں بڑھتی ہوئی دلچسپی کو دیکھ کر انہیں بے پناہ خوشی محسوس ہو رہی ہے۔ انہوں نے انکشاف کیا کہ یہ وہی کھیلوں کا ترقیاتی منصوبہ ہے جس کی پاداش میں انہیں ماضی میں جیل کی ہوا بھی کھانا پڑی تھی، اور آج گراؤنڈز کو آباد دیکھ کر ان کا ایک اور دیرینہ خواب حقیقت بن گیا ہے۔

وفاقی وزیر نے کہا کہ نارووال اب پسماندہ ضلع نہیں رہا بلکہ یہ تعلیم کے میدان میں بھی صفِ اول کے اضلاع میں شامل ہو چکا ہے، اور اب کھیلوں کے شعبے میں بھی اس نے اپنی نمایاں شناخت بنا لی ہے۔ انہوں نے اس امر پر بھی خوشی کا اظہار کیا کہ کھیلوں کی ان سرگرمیوں میں بچوں اور بچیوں کی بڑی تعداد شرکت کر رہی ہے، کیونکہ نوجوانوں کو معیاری تعلیم، ہنر اور کھیلوں کی بہترین سہولیات فراہم کر کے ہی انہیں ملک کا قیمتی سرمایہ بنایا جا سکتا ہے۔