نیتن یاہو کا امریکا کا دورہ بحران پیدا کرسکتا ہے: ایران نے خبردار کر دیا

ایران کے مشیر قومی سلامتی علی لاریجانی نے خبردار کیا ہے کہ اسرائیلی وزیر اعظم بنیامین نیتن یاہو کا امریکا کا دورہ خطے میں نئے بحران کو جنم دے سکتا ہے۔

علی لاریجانی کا کہنا تھا کہ امریکا کے ساتھ جاری مذاکرات میں ایرانی مؤقف واضح اور حقیقت پسندانہ ہے۔ انہوں نے کہا کہ واشنگٹن کے ساتھ گفتگو میں صرف جوہری معاملات زیر بحث آئے اور کسی بھی مرحلے پر ایران کے فوجی یا میزائل پروگرام کو مذاکرات کا حصہ نہیں بنایا گیا۔

ان کا کہنا تھا کہ ایران اپنی قومی سلامتی اور دفاعی صلاحیتوں پر کوئی سمجھوتہ نہیں کرے گا، تاہم سفارتی عمل کو آگے بڑھانے کے لیے سنجیدہ کوششیں جاری ہیں۔

دوسری جانب علی لاریجانی نے عمان کے سلطان سے بھی ملاقات کی، جس میں ایران اور عمان کے دوطرفہ تعلقات، علاقائی صورتحال اور دیگر اہم امور پر تفصیلی تبادلہ خیال کیا گیا۔ ملاقات میں خطے میں امن و استحکام کے فروغ اور سفارتی روابط کو مزید مضبوط بنانے پر بھی اتفاق کیا گیا۔