امریکا نے ایران سے اشیاء خریدنے والے ممالک پر ثانوی ٹیرف عائد کردیا

امریکا نے ایران سے اشیاء خریدنے اور تجارت کرنے والے ممالک پر 25 فیصد ثانوی ٹیرف عائد کرنے کا اعلان کر دیا ہے۔ وائٹ ہاؤس کے مطابق امریکی صدر ڈونلڈ ٹرمپ نے اس حوالے سے ایگزیکٹو آرڈر پر دستخط کر دیے ہیں اور یہ حکم فوری طور پر نافذ العمل ہوگا۔

وائٹ ہاؤس کے بیان میں کہا گیا ہے کہ جو بھی ملک ایران کے ساتھ تجارت کرے گا، اسے امریکا کے ساتھ ہونے والی ہر قسم کی تجارت پر اضافی 25 فیصد ٹیرف ادا کرنا ہوگا۔

امریکی محکمہ خارجہ کے مطابق ایران کی غیر قانونی تیل کی تجارت میں ملوث 15 اداروں، 2 افراد اور 14 بحری جہازوں پر بھی پابندیاں عائد کر دی گئی ہیں۔ حکام کا کہنا ہے کہ یہ اقدام ایران کی معیشت پر دباؤ بڑھانے اور غیر قانونی تجارتی سرگرمیوں کو روکنے کے لیے اٹھایا گیا ہے۔

واضح رہے کہ صدر ٹرمپ نے چند روز قبل سوشل میڈیا پر جاری بیان میں خبردار کیا تھا کہ ایران کے ساتھ کاروبار کرنے والے ممالک کو سخت اقتصادی نتائج کا سامنا کرنا پڑے گا۔ ان کا کہنا تھا کہ یہ فیصلہ حتمی ہے اور اس پر کسی قسم کی نرمی نہیں برتی جائے گی۔

ماہرین کے مطابق اس اقدام سے عالمی تجارت پر اثرات مرتب ہو سکتے ہیں، خاص طور پر ان ممالک پر جو ایران کے ساتھ توانائی اور دیگر شعبوں میں تجارتی روابط رکھتے ہیں۔