ایران اور اسرائیل کے درمیان جوہری تصادم کو روکا، امریکی صدر کا دعویٰ

واشنگٹن: امریکی صدر ڈونلڈ ٹرمپ نے دعویٰ کیا ہے کہ انہوں نے ایران اور اسرائیل کے درمیان ممکنہ جوہری تصادم کو روکنے میں کردار ادا کیا۔

سوشل میڈیا پلیٹ فارم “ٹروتھ سوشل” پر جاری بیان میں صدر ٹرمپ نے کہا کہ امریکا دنیا کا سب سے طاقتور ملک ہے اور انہوں نے اپنی پہلی مدتِ صدارت کے دوران امریکی فوج کو ازسرِ نو مضبوط کیا۔

انہوں نے کہا کہ امریکا نے جدید ترین جوہری ہتھیار تیار کیے ہیں اور اسپیس فورس کا قیام ان کی حکومت کا ایک بڑا کارنامہ ہے۔

جدید بحری طاقت میں اضافہ

صدر ٹرمپ کے مطابق امریکا اپنے بحری بیڑے میں انتہائی طاقتور اور جدید جنگی جہاز شامل کر رہا ہے۔ انہوں نے دعویٰ کیا کہ نئے بیٹل شپس دوسری جنگِ عظیم کے جہازوں سے سو گنا زیادہ طاقتور ہوں گے۔

پاک بھارت اور روس یوکرین کا ذکر

ڈونلڈ ٹرمپ نے یہ بھی کہا کہ انہوں نے پاکستان اور بھارت کے درمیان جوہری جنگ رکوانے میں کردار ادا کیا اور روس و یوکرین کے درمیان ایٹمی جنگ کو بھی ہونے سے روکا۔

امریکی صدر نے مزید کہا کہ امریکا کو ایک نئے اور جدید جوہری معاہدے کی ضرورت ہے۔