وانا کیڈٹ کالج پر دہشتگردوں کا حملہ، تمام طلبا، اساتذہ کو بحفاظت ریسکیو، آپریشن حتمی مرحلے میں داخل

پشاور: وانا کیڈٹ کالج پر دہشتگردوں کے حملے کے بعد سیکیورٹی فورسز نے نہایت احتیاط اور حکمتِ عملی کے ساتھ آپریشن کرتے ہوئے تمام طلبا اور اساتذہ کو بحفاظت ریسکیو کرلیا۔ سیکیورٹی ذرائع کے مطابق آپریشن حتمی مرحلے میں داخل ہو چکا ہے اور تین افغان خوارجیوں کو کالج کے ایڈمن بلاک تک محدود کردیا گیا ہے۔

ذرائع کے مطابق حملہ آوروں نے گزشتہ روز بارود سے بھری گاڑی کالج کے مرکزی گیٹ سے ٹکرا دی تھی، جس کے نتیجے میں گیٹ منہدم ہوگیا اور قریبی عمارتوں کو نقصان پہنچا۔ تاہم پاک فوج کے جوانوں نے بروقت کارروائی کرتے ہوئے دو دہشتگردوں کو موقع پر ہی ہلاک کردیا، جبکہ تیسرے حملہ آور کے خلاف آپریشن جاری ہے۔

سیکیورٹی ذرائع کے مطابق ہلاک دہشتگردوں کے فون سے اہم فوٹیجز اور شواہد حاصل کرلیے گئے ہیں۔ ابتدائی تحقیقات کے مطابق حملہ آور افغانستان میں موجود ہینڈلرز سے مسلسل رابطے میں تھے۔

حملے کے وقت کیڈٹ کالج میں 525 کیڈٹس سمیت تقریباً 650 افراد موجود تھے۔ اب تک 115 افراد کو بحفاظت نکالا جاچکا ہے جبکہ باقی کیڈٹس کالج کے اندر محفوظ ہیں۔ سیکیورٹی فورسز نے کالج اور اردگرد کے علاقے کو مکمل طور پر گھیرے میں لے رکھا ہے تاکہ کسی بھی ممکنہ فرار کو روکا جا سکے۔

ذرائع کے مطابق فورسز والدین سے اپیل کر رہی ہیں کہ وہ پُر سکون رہیں کیونکہ تمام طلبا اور اساتذہ محفوظ ہیں۔ سیکیورٹی حکام کا کہنا ہے کہ آپریشن جامع انداز میں جاری ہے اور جلد مکمل کرلیا جائے گا۔