ایران کے سخت گیر دھڑے نے امریکا کیساتھ جون میں طے پانے والا امن معاہدہ سبوتاژ کیا، امریکی اخبار

امریکی اخبار ‘نیویارک ٹائمز’ نے سنسنی خیز انکشاف کیا ہے کہ ایران کے ایک سخت گیر دھڑے نے ملک کی اعلیٰ سیاسی اور عسکری قیادت کی اجازت کے بغیر جولائی میں آبنائے ہرمز میں تجارتی بحری جہازوں پر حملے کیے، جس کے نتیجے میں ایران اور امریکہ کے درمیان جون میں طے پانے والا تاریخی امن معاہدہ سبوتاژ ہو گیا۔ رپورٹ کے مطابق یہ حملے 6 اور 7 جولائی کی درمیانی شب کیے گئے، جن میں قطر کے ایک ایل این جی (LNG) ٹینکر سمیت تین تجارتی جہازوں کو نشانہ بنایا گیا۔ ان حملوں کے بعد واشنگٹن نے تہران کے خلاف دوبارہ شدید فضائی حملے اور سخت اقتصادی پابندیاں عائد کر دیں، جس سے خطے میں جوابی کارروائیوں کا ایک نیا خطناک سلسلہ شروع ہو گیا۔

اخبار کے مطابق اس غیر مجاز کارروائی نے ایرانی صدر مسعود پزشکیان کو شدید برہم کر دیا، جو اس وقت سابق سپریم لیڈر سید علی خامنہ ای کی آخری رسومات کے سلسلے میں عراق میں موجود تھے۔ ذرائع کا کہنا ہے کہ صدر پزشکیان فوری تہران واپس پہنچے اور غصے میں پاسدارانِ انقلاب (IRGC) کے سربراہ احمد وحیدی کو فون کر کے جواب طلبی کی۔ تاہم، احمد وحیدی نے اس حملے کی اجازت دینے یا اس کے بارے میں پیشگی علم ہونے سے صاف انکار کر دیا۔