ایران اور خلیجی ممالک کے درمیان مذاکرات کیلئے آج عمان میں ہونے والا اجلاس ملتوی ہو گیا

عمان میں ایران اور خلیجی ممالک کے درمیان آبنائے ہرمز سے متعلق اہم سمندری انتظامات اور ممکنہ معاہدوں پر تبادلہ خیال کے لیے آج منعقد ہونے والا حساس اجلاس غیر معینہ مدت کے لیے ملتوی کر دیا گیا ہے۔ عمان کے وزیرِ خارجہ بدر البوسعیدی نے سوشل میڈیا پلیٹ فارم ‘ایکس’ (سابقہ ٹوئٹر) پر جاری اپنے ایک باقاعدہ بیان میں اجلاس کی التوا کی تصدیق کی، تاہم انہوں نے اس فیصلے کی وجوہات یا نئی تاریخ کے حوالے سے فی الحال کوئی تفصیلا ت فراہم نہیں کیں۔

خیال رہے کہ مجوزہ اجلاس کے دوران تہران کی جانب سے آبنائے ہرمز کا نیا بحری نقشہ اور دفاعی تجاویز پیش کی جانی تھیں۔ عالمی سطح پر خام تیل اور ایل این جی کی ترسیل کے لیے انتہائی کلیدی حیثیت رکھنے کی وجہ سے اس سمندری گزرگاہ کے حوالے سے کوئی بھی سفارتی پیشرفت خطے کی سیکیورٹی، پائیدار امن اور عالمی توانائی کی منڈیوں کی استواری کے لیے انتہائی اہم سمجھی جا رہی ہے۔