آئی سی سی نے ٹی ٹوئنٹی ورلڈکپس کی آئیکونک پرفارمنس کی فہرست جاری کر دی

انٹرنیشنل کرکٹ کونسل (آئی سی سی) نے ٹی ٹوئنٹی ورلڈکپس کی تاریخ کی آئیکونک پرفارمنسز کی فہرست جاری کر دی ہے، جس میں پاکستان کے سابق مایہ ناز آل راؤنڈر شاہد آفریدی کا نام بھی شامل کیا گیا ہے۔

آئی سی سی کے مطابق 2009ء کے ٹی ٹوئنٹی ورلڈکپ میں شاہد آفریدی کی شاندار آل راؤنڈر کارکردگی کو آئیکونک قرار دیا گیا۔ آفریدی نے سیمی فائنل میں 51 رنز اسکور کرنے کے ساتھ 2 اہم وکٹیں حاصل کر کے پاکستان کو فائنل میں پہنچایا، جبکہ فائنل میں انہوں نے 40 گیندوں پر 54 رنز کی میچ وننگ اننگز کھیل کر قومی ٹیم کو ٹائٹل دلانے میں کلیدی کردار ادا کیا۔

آئی سی سی کی جاری کردہ فہرست کے مطابق 2007ء کے پہلے ٹی ٹوئنٹی ورلڈکپ میں بھارت کے یووراج سنگھ کے ایک اوور میں 6 چھکے، 2010ء میں آسٹریلیا کے مائیک ہسی کی پاکستان کے خلاف 24 گیندوں پر 60 رنز کی اننگز کو بھی آئیکونک پرفارمنسز میں شامل کیا گیا ہے۔

اسی طرح 2012ء کے ورلڈکپ میں ویسٹ انڈیز کے سنیل نارائن کی 9 رنز دے کر 3 وکٹیں، 2014ء کے سیمی فائنل میں سری لنکا کے رنگانا ہیراتھ کی 5 وکٹیں بھی اس فہرست کا حصہ بنیں۔

آئی سی سی نے 2016ء کے ورلڈکپ فائنل میں کارلوس بریتھویٹ کے لگائے گئے 4 مسلسل چھکوں، 2021ء کے فائنل میں مچل مارش کی 77 رنز کی اننگز اور 2022ء کے ورلڈکپ میں انگلینڈ کے بین اسٹوکس کی پاکستان کے خلاف 52 رنز کی اننگز کو بھی آئیکونک قرار دیا۔

حالیہ 2024ء کے ٹی ٹوئنٹی ورلڈکپ میں بھارت کے اسٹار بلے باز ویرات کوہلی کی 76 رنز کی شاندار اننگز کو بھی آئی سی سی نے آئیکونک پرفارمنسز کی فہرست میں شامل کر لیا ہے۔