ایرانی کمانڈر کا اردن میں حملے کے دوران 200 امریکیوں کی ہلاکت کا دعویٰ

ایرانی پاسدارانِ انقلاب (IRGC) کے سینئر کمانڈر بریگیڈیئر جنرل محمد رضا نقدی نے دعویٰ کیا ہے کہ اردن میں کی گئی ایک عسکری کارروائی کے دوران 200 امریکی فوجی ہلاک ہوئے ہیں۔

بریگیڈیئر جنرل محمد رضا نقدی کے مطابق ان ہلاکتوں سے متعلق معلومات اردن کے ہلالِ احمر (Red Crescent) کی جانب سے فراہم کی گئی ہیں، تاہم اس شدید اور غیر معمولی دعوے کی کسی بھی عالمی ادارے یا آزاد ذرائع سے تصدیق نہیں ہو سکی ہے۔ اس کے علاوہ ایرانی کمانڈر نے یہ دعویٰ بھی کیا کہ کویت اور بحرین میں ان ہوٹلوں کو بھی نشانہ بنایا گیا جہاں امریکی ملٹری اہلکار مقیم تھے۔

محمد رضا نقدی نے کہا کہ مبینہ حملوں کے بعد متعلقہ ہوٹلوں کے باہر طویل وقت تک ایمبولینسز کی آمدورفت جاری رہی، تاہم انہوں نے ان مبینہ واقعات کی حتمی تفصیلات یا ہلاکتوں کے مستند اعداد و شمار فراہم نہیں کیے۔ واضح رہے کہ اردن، کویت، بحرین یا امریکی حکام کی جانب سے ان دعوؤں اور امریکی ہلاکتوں سے متعلق کسی قسم کا باضابطہ تصدیقی بیان سامنے نہیں آیا ہے۔