انڈونیشی پائلٹ کی شہریت پر اسرائیل نے ایتھوپین ایئرلائنز کا کارگو طیارہ واپس بھیج دیا

اسرائیلی حکام نے انڈونیشیائی کپتان کی شہریت کو بنیاد بناتے ہوئے ایتھوپین ایئرلائنز (Ethiopian Airlines) کے ایک کارگو طیارے کو اپنے بن گوریون ایئرپورٹ پر لینڈنگ کی اجازت دینے سے معذرت کر لی، جس کے بعد طیارے کو بیچ فضا سے ہی ایتھوپیا کے دارالحکومت ادیس ابابا (Addis Ababa) واپس لوٹنا پڑا۔

میڈیا رپورٹس کے مطابق اسرائیل نے سیکیورٹی خدشات اور پالیسیوں کے تحت تقریباً 31 ممالک کے شہریوں کے زیرِ کمان پرواز کرنے والے طیاروں کی لینڈنگ پر سخت ضوابط اور پابندیاں عائد کر رکھی ہیں، تاہم اس فہرست میں شامل دیگر ممالک کی مکمل تفصیلات عام نہیں کی گئیں۔

اسرائیلی میڈیا کا کہنا ہے کہ اس سفارتی و آپریشنل تعطل کے بعد ایتھوپین ایئرلائنز نے فوری کارروائی کرتے ہوئے انڈونیشیائی پائلٹ کو تبدیل کر کے ایک دوسرے ملک سے تعلق رکھنے والے پائلٹ کو تعینات کیا۔ عملے میں اس تبدیلی کے بعد کارگو طیارے نے ادیس ابابا سے دوبارہ تل ابیب کے لیے پرواز بھری اور بعد ازاں بن گوریون ایئرپورٹ پر بحفاظت لینڈ کر گیا۔