امریکی رکن کانگریس الہان عمر پر ٹاؤن ہال اجلاس کے دوران بدبودار مائع پھینک دیا گیا

امریکا کی ڈیموکریٹک مسلم رکن کانگریس الہان عمر پر منی سوٹا کے شہر میناپولیس میں ایک ٹاؤن ہال میٹنگ کے دوران بدبودار مائع پھینک دیا گیا۔ واقعہ اُس وقت پیش آیا جب الہان عمر اجلاس سے خطاب کر رہی تھیں۔

رپورٹس کے مطابق مائع پھینکے جانے سے الہان عمر کو کوئی جسمانی نقصان نہیں پہنچا۔ موقع پر موجود سکیورٹی اہلکاروں نے فوری کارروائی کرتے ہوئے مبینہ طور پر ایک سفید فام شخص کو حراست میں لے لیا۔

الہان عمر اس ٹاؤن ہال اجلاس میں امریکی وزیر ہوم لینڈ سکیورٹی کرسٹی نوم سے استعفے یا مواخذے کا مطالبہ کر رہی تھیں۔

واضح رہے کہ الہان عمر کو ماضی میں بھی سابق امریکی صدر ڈونلڈ ٹرمپ کی جانب سے سخت تنقید کا سامنا رہا ہے۔ ان کے والدین کا تعلق صومالیہ سے ہے اور وہ امریکا میں مسلم کمیونٹی کی ایک نمایاں اور توانا آواز سمجھی جاتی ہیں۔