قومی بچت اسکیموں کی شرح منافع میں کمی، نیا نوٹیفکیشن جاری

حکومت نے مختلف قومی بچت اسکیموں کی شرح منافع میں رد و بدل کا اعلان کر دیا ہے، جس کا اطلاق 23 جنوری سے ہوگا۔ اس حوالے سے وزارت خزانہ کی جانب سے باضابطہ نوٹیفکیشن بھی جاری کر دیا گیا ہے۔

نوٹیفکیشن کے مطابق اسپیشل سیونگز سرٹیفکیٹ پر سالانہ منافع 9.6 فیصد سے کم کر کے 9.4 فیصد کر دیا گیا ہے، جبکہ ریگولر انکم سرٹیفکیٹ پر شرح منافع 10.2 فیصد سے گھٹ کر 9.96 فیصد مقرر کی گئی ہے۔

اسی طرح 3 ماہ کے شارٹ ٹرم سیونگز سرٹیفکیٹ پر منافع کی شرح 10 فیصد کے بجائے 9.64 فیصد ہو گئی ہے، جبکہ 6 ماہ کے شارٹ ٹرم سیونگز پر منافع 9.9 فیصد سے کم ہو کر 9.58 فیصد رہ گیا ہے۔

نوٹیفکیشن میں بتایا گیا ہے کہ ڈیفنس سیونگز سرٹیفکیٹ پر مجموعی منافع میں کمی کی گئی ہے، تاہم بہبود سیونگز سرٹیفکیٹ پر شرح منافع 12 فیصد پر برقرار رکھی گئی ہے۔

اسی طرح پنشنرز بینیفٹ اکاؤنٹ پر منافع کی شرح 12 فیصد، سیونگ اکاؤنٹ پر 9 فیصد برقرار رہے گی، جبکہ سروا اسلامک سیونگز اسکیموں پر بھی شرح منافع میں کوئی تبدیلی نہیں کی گئی۔