گل پلازہ آتشزدگی کے اثرات: رمپا پلازہ کے حصے غیر محفوظ قرار، عمارت عارضی سیل

کراچی میں گل پلازہ میں لگنے والی آگ کے اثرات سامنے آتے ہوئے ساتھ موجود عمارت رمپا پلازہ کے کچھ حصوں کو غیر محفوظ قرار دے دیا گیا ہے۔ سندھ بلڈنگ کنٹرول اتھارٹی (ایس بی سی اے) کے مطابق گل پلازہ کی عمارت کا کچھ حصہ رمپا پلازہ کے ریمپ پر آ کر گرا جس کے نتیجے میں رمپا پلازہ کے اسٹرکچرل کالمز کو نقصان پہنچا ہے۔

ایس بی سی اے حکام کا کہنا ہے کہ انسپکشن کے دوران متاثرہ حصے کو خطرناک اور غیر محفوظ قرار دیا گیا ہے اور رمپا پلازہ کے مالکان کو ہدایت جاری کی گئی ہے کہ متاثرہ حصے کو استعمال نہ کیا جائے۔ عارضی طور پر رمپا پلازہ کو سیل کر دیا گیا ہے جبکہ کوالیفائیڈ انجنیئر سے فوری مرمت کرانے کے احکامات بھی جاری کیے گئے ہیں۔

حکام کے مطابق اگر متاثرہ حصے کو مرمت کے بغیر استعمال کیا گیا تو سندھ بلڈنگ کنٹرول آرڈیننس 1979 کے تحت کارروائی عمل میں لائی جائے گی۔ دوسری جانب فائر بریگیڈ کا کہنا ہے کہ عمارت میں فائر فائٹنگ کا کام مکمل ہو چکا ہے تاہم کچھ حصوں میں آگ کے ہلکے شعلے موجود ہیں جنہیں پاکٹس کہا جا رہا ہے۔

فائر بریگیڈ حکام کے مطابق اسنارکل کی مدد سے بالائی منزلوں کا بھی معائنہ کیا جائے گا تاکہ کسی ممکنہ خطرے سے بچا جا سکے۔