پاک امریکا مشق انسپائرڈ گمبٹ 2026، دونوں افواج کی اعلیٰ پیشہ ورانہ صلاحیتوں کا مظاہرہ

اسلام آباد: پاک امریکا مشترکہ فوجی مشق انسپائرڈ گمبٹ 2026 میں دونوں ملکوں کی افواج کے شرکاء نے اعلیٰ سطح کی پیشہ ورانہ مہارت کا مظاہرہ کیا۔

آئی ایس پی آر کے مطابق مشق 8 جنوری سے شروع ہوئی جو 16 جنوری تک جاری رہے گی۔ مشق کے سلسلے میں جمعرات کو نیشنل کاؤنٹر ٹیررازم سینٹر پبی میں معزز مہمانوں کے لیے خصوصی تقریب منعقد کی گئی۔

آئی ایس پی آر کے مطابق امریکا کی ناظم الامور نیٹلی اے بیکر اور دیگر سینئر امریکی فوجی شخصیات نے تقریب میں شرکت کی۔ مہمانوں کو مشق کی اہمیت، مقاصد اور انعقاد کے طریقہ کار پر بریفنگ دی گئی۔

آئی ایس پی آر کا کہنا ہے کہ دونوں ملکوں کی افواج کے شرکاء نے دہشت گردی سے نمٹنے کی مشقوں کے دوران اعلیٰ درجے کی پیشہ ورانہ صلاحیت کا مظاہرہ کیا، جسے معزز مہمانوں نے سراہا۔

ترجمان کے مطابق مشق کا مقصد دہشت گردی سے نمٹنے کے تجربات کے تبادلے کے ذریعے دو طرفہ فوجی تعاون کو فروغ دینا، مشقوں اور طریقہ کار کو مزید مؤثر بنانا اور باہمی ہم آہنگی کی صلاحیت کو مضبوط کرنا ہے۔