9ویں نیشنل اسپورٹس کلائمبنگ چیمپئن شپ 6 سے 8 جنوری تک جاری

9ویں نیشنل اسپورٹس کلائمبنگ چیمپئن شپ اینڈ راک کلائمبنگ کمپٹیشن 6 سے 8 جنوری 2026 تک منعقد کی جا رہی ہے، جس میں گلگت بلتستان، ہائر ایجوکیشن کمیشن، خیبرپختونخوا، پنجاب، اسلام آباد، آزاد کشمیر، سندھ، سوئی نادرن گیس پائپ لائن اور بلوچستان سے 50 سے زائد کھلاڑی شرکت کر رہے ہیں۔

7 جنوری کو سید پور میں راک کلائمبنگ مقابلے ہوں گے، جبکہ سیکرٹری آئی پی سی محی الدین وانی بطور مہمان خصوصی شریک ہوں گے۔ محی الدین وانی نے کہا کہ کلائمبنگ ذہنی مضبوطی کا کھیل ہے، حکومت اس کی بھرپور سرپرستی کرے گی، سکولوں اور کالجوں سے ٹیلنٹ سامنے لایا جائے گا اور عام عوام کے لیے بھی سہولیات فراہم کی جائیں گی۔

صدر الپائن کلب آف پاکستان میجر جنرل (ر) عرفان ارشد نے کہا کہ پاکستان میں دنیا کی بلند ترین چوٹیوں میں سے پانچ اور مجموعی طور پر 62 بلند چوٹیاں موجود ہیں، کلائمبنگ کو فروغ دینے کے لیے اولمپک معیار کی کلائمبنگ وال ناگزیر ہے۔ ڈی جی پی ایس بی آزاد کشمیر ملک شوکت حیات اعوان نے کہا کہ آزاد کشمیر میں اس کھیل کو فروغ دیا جا رہا ہے اور بجٹ میں اس کے لیے رقم مختص کی گئی ہے۔