سانحہ گل پلازہ پر سیاست نہ کی جائے، وزیر داخلہ سندھ ضیاءالحسن لنجار

شہدادپور: وزیر داخلہ سندھ ضیاءالحسن لنجار نے شہدادپور پولیس ٹریننگ کالج میں میڈیا سے گفتگو کرتے ہوئے کہا کہ سانحہ گل پلازہ پر ہم سب کو افسوس ہے اور اس واقعے میں قیمتی جانوں کا ضیاع ہوا ہے۔

انہوں نے کہا کہ گل پلازہ آتشزدگی واقعے کا مقدمہ درج کر لیا گیا ہے جس میں غفلت اور لاپرواہی کی شقیں شامل کی گئی ہیں۔ وزیر داخلہ سندھ نے واضح کیا کہ اس افسوسناک سانحے پر سیاست سے گریز کیا جانا چاہیے۔

ضیاءالحسن لنجار کا کہنا تھا کہ اس واقعے کو اٹھارویں ترمیم اور این ایف سی ایوارڈ سے نتھی کیا جا رہا ہے جو سمجھ سے بالاتر ہے۔ انہوں نے ایم کیو ایم سے مخاطب ہوتے ہوئے کہا کہ لاشوں پر سیاست نہ کی جائے، ایسے واقعات لاہور، پشاور یا ملک کے کسی بھی حصے میں ہو سکتے ہیں۔

وزیر داخلہ سندھ نے بتایا کہ وزیراعلیٰ سندھ گزشتہ روز اس معاملے پر تمام حقائق بیان کر چکے ہیں۔ ان کے مطابق گل پلازہ مارکیٹ کی لیز فاروق ستار کے میئر کے دور میں دی گئی تھی جبکہ موجودہ میئر کراچی کی ترقی کے لیے بھرپور کام کر رہے ہیں۔

انہوں نے کہا کہ وزیراعلیٰ سندھ جاں بحق افراد کے لواحقین کے لیے امداد کا اعلان کر چکے ہیں اور متاثرین کو دکانیں بنا کر دی جائیں گی۔

امن و امان کے حوالے سے بات کرتے ہوئے وزیر داخلہ سندھ نے کہا کہ امن کا قیام حکومت کی اولین ترجیحات میں شامل ہے، کچے کے ڈاکوؤں کے خاتمے یا انہیں سرینڈر کروانے کے لیے اقدامات جاری ہیں۔

انہوں نے مزید بتایا کہ منشیات کی روک تھام کے لیے ٹاسک فورس قائم کی گئی ہے جو مؤثر انداز میں کام کر رہی ہے