روس شمالی کوریا کی مدد کے بغیر مزید جنگ جاری نہیں رکھ سکتا: زیلنسکی کا دعویٰ

یوکرین کے صدر ولودومیر زیلنسکی نے دعویٰ کیا ہے کہ روس اپنی تاریخ میں پہلی بار تمام اسٹریٹجک ذخائر سے محروم ہو چکا ہے اور وہ شمالی کوریا کی مدد کے بغیر یوکرین کے خلاف جنگ جاری رکھنے کی صلاحیت کھو چکا ہے۔ زیلنسکی کے مطابق ماسکو کو پیانگ یانگ کی جانب سے بیلسٹک میزائل اور دیگر فوجی سامان تو مل ہی رہا ہے، ساتھ ہی 30 ہزار سے 50 ہزار تک شمالی کوریائی فوجیوں کو بھی روس میں تعینات کیا جا رہا ہے۔ یوکرینی صدر نے خبردار کیا کہ دونوں ممالک کے اس بڑھتے ہوئے فوجی تعاون کے اثرات صرف ان کے خطے تک محدود نہیں رہیں گے بلکہ دور رس ہوں گے، نیز اس سے پیانگ یانگ کو حقیقی جنگی حالات میں اپنے ہتھیاروں اور فوجی دستوں کی صلاحیتوں کو آزمانے کا نادر موقع مل رہا ہے۔