پاکستان کے دفاع پر کوئی سمجھوتہ نہیں ہوگا: وزیراعظم کا یومِ تکبیر پر واضح پیغام

وزیراعظم پاکستان شہباز شریف نے یومِ تکبیر کے موقع پر اپنے خصوصی پیغام میں کہا ہے کہ پاکستان کے دفاع پر کسی بھی صورت کوئی سمجھوتہ نہیں کیا جائے گا اور ملک کا مضبوط ایٹمی نظام دشمن کی ہر جارحیت کے سامنے آہنی دیوار ہے۔

وزیراعظم نے اپنے بیان میں کہا کہ اٹھائیس مئی انیس سو اٹھانوے کو پاکستان نے ایٹمی دھماکوں کے ذریعے خطے میں طاقت کا توازن بحال کیا اور دشمن کے تمام عزائم کو ناکام بنا دیا۔

انہوں نے کہا کہ پاکستان کی مسلح افواج ہر وقت مکمل طور پر تیار ہیں اور قوم اپنے دفاعی اداروں کے ساتھ متحد اور پرعزم ہے۔

وزیراعظم نے قومی ایٹمی پروگرام کی تکمیل میں سابق وزیراعظم ذوالفقار علی بھٹو، قومی سائنسدان ڈاکٹر عبدالقدیر خان، ڈاکٹر ثمر مبارک مند اور دیگر سائنسدانوں و انجینئرز کی خدمات کو خراجِ تحسین پیش کیا۔

انہوں نے مزید کہا کہ اس وقت کے وزیراعظم نواز شریف نے تمام تر دباؤ کے باوجود قومی سلامتی اور خودمختاری کا تاریخی فیصلہ کیا۔

وزیراعظم نے اس موقع پر کویت کے ولی عہد شیخ صباح الخالد الحمد المبارک الصباح سے ہونے والی ٹیلیفونک گفتگو کا بھی ذکر کیا جس میں عید کی مبارکباد اور دوطرفہ تعلقات کو مزید مضبوط بنانے پر اتفاق کیا گیا۔