موریطانیہ کشتی حادثہ کیس، انسانی سمگلر طارق محمود کو 10 سال قید بامشقت کی سزا

موریطانیہ کشتی حادثہ کیس میں وفاقی تحقیقاتی ادارے (ایف آئی اے) کو بڑی قانونی کامیابی مل گئی ہے، جہاں اسپیشل جج سینٹرل ون کی عدالت نے جرم ثابت ہونے پر انسانی اسمگلر طارق محمود کو مجموعی طور پر 10 سال قیدِ بامشقت اور 20 لاکھ روپے جرمانے کی سزا سنا دی ہے۔ ایف آئی اے حکام کے مطابق مجرم طارق محمود نے دو نوجوانوں کو غیر قانونی طور پر اسپین بھجوانے کے نام پر متاثرہ خاندان سے 80 لاکھ روپے وصول کیے تھے، تاہم موریطانیہ کشتی حادثے میں متاثرہ خاندان کا بیٹا اور بھتیجا جاں بحق ہو گئے تھے۔ عدالتی فیصلے کے مطابق مجرم کو امیگریشن آرڈیننس کی دفعہ 22 بی کے تحت 10 سال قیدِ بامشقت اور 10 لاکھ روپے جرمانہ، دفعہ 17 ٹو بی کے تحت 4 سال قید اور 5 لاکھ روپے جرمانہ جبکہ اسمگلنگ ایکٹ کے تحت 7 سال قید اور 5 لاکھ روپے جرمانے کی سزا سنائی گئی ہے، جبکہ مجرم کو جاں بحق نوجوانوں کے ورثاء مصباح بی بی اور محمد جعفر کو 10، 10 لاکھ روپے ہرجانہ ادا کرنے کا بھی حکم دیا گیا ہے۔ عدالت نے قرار دیا کہ مجرم کی تمام سزائیں بیک وقت چلیں گی تاہم جرمانے کی عدم ادائیگی کی صورت میں اسے مزید 6 ماہ قید بھگتنا ہوگی۔