ورلڈ کلچرل فیسٹیول میں عربی موسیقی کی دلفریب دھنوں نے شائقین کے دل جیت لیے

ورلڈ کلچرل فیسٹیول کے 17ویں روز عربی لے اور کلاسیکی آہنگ کا جادو شرکاء کے سر چڑھ کر بولا، جہاں عالمی شہرت یافتہ فنکاروں نے اپنی منفرد پیشکش اور تربیتی سیشنز سے سماں باندھ دیا۔

فیسٹیول کے اس خصوصی دن کے موقع پر متحدہ عرب امارات، شام، تیونس، امریکہ اور مونٹی نیگرو سے تعلق رکھنے والے بین الاقوامی فنکاروں نے ایک خصوصی میوزک ورکشاپ کا انعقاد کیا اور شریک نوجوانوں و فنونِ لطیفہ کے طلبہ کو عربی موسیقی کے رموز کی عملی تربیت دی۔

عربی موسیقی کی دلفریب لے اور روایتی کلاسیکی اسلوب کو قریب سے جاننے اور سمجھنے کے لیے شائقینِ موسیقی کی بڑی تعداد نے اس ایونٹ میں شرکت کی، جبکہ ورکشاپ کے دوران شرکاء نے سیکھنے کے عمل میں بھرپور دلچسپی اور جوش و خروش کا اظہار کیا۔

خصوصی ورکشاپ کے دوران بین الاقوامی ماہر فنکاروں نے شرکاء کو عربی تال، سُروں کے اتار چڑھاؤ اور کلاسیکی دھنوں کی فنی باریکیوں سے تفصیلی طور پر آگاہ کیا، جبکہ سیشن کے اختتام پر ان عالمی فنکاروں نے لائیو پرفارمنس کے ذریعے اپنی مسحور کن آواز اور سازوں کا جادو بھی جگایا۔

مختلف براعظموں اور ممالک سے تعلق رکھنے والے باصلاحیت فنکاروں کے باہمی اشتراک سے سجنے والی اس منفرد اور یادگار ثقافتی محفل نے حاضرین اور شائقینِ موسیقی کے دل جیت لیے اور ہال تالیوں سے گونجتا رہا۔