عالمی بینک نے صوبہ سندھ کیلئے 30 کروڑ ڈالر فنانسنگ کی منظوری دے دی

عالمی بینک نے صوبہ سندھ کے دیہی علاقوں میں بنیادی سہولیات کی بہتری اور عوامی صحت کے تحفظ کے لیے 30 کروڑ ڈالر (300 ملین ڈالر) کی خطیر فنانسنگ کی باضابطہ منظوری دے دی ہے۔

عالمی بینک کی جانب سے جاری کردہ سرکاری اعلامیے کے مطابق اس اہم مالی معاونت کے نتیجے میں صوبہ سندھ کے پسماندہ دیہی علاقوں میں بسنے والے تقریباً 15 لاکھ افراد کو پینے کے صاف پانی، نکاسی آب اور حفظانِ صحت کی معیاری سہولتیں میسر آئیں گی۔ اعلامیے میں واضح کیا گیا ہے کہ عالمی بینک کی جانب سے یہ فنڈنگ خصوصی طور پر ’’اسٹار واش ون‘‘ (STAR WASH-I) منصوبے کی تکمیل کے لیے فراہم کی جائے گی۔

اعلامیے میں اس تشویشناک پہلو کی نشاندہی کرتے ہوئے کہا گیا ہے کہ پاکستان میں بچوں کی جسمانی نشوونما متاثر ہونے اور قد نہ بڑھنے (اسٹنٹنگ) کی سب سے بڑی وجہ غیر محفوظ آلودہ پانی اور صفائی کا ناقص نظام ہے۔ عالمی بینک کے مطابق اس منصوبے پر مؤثر عملدرآمد سے دیہی سندھ میں بچوں میں اسٹنٹنگ کی بنیادی وجہ کا خاتمہ ممکن ہو سکے گا اور آئندہ نسلوں کی صحت بہتر ہوگی۔

اس موقع پر عالمی بینک کے کنٹری ڈائریکٹر نے صوبہ سندھ کے دیہی علاقوں میں پینے کے صاف پانی کی بلا تعطل فراہمی اور صفائی ستھرائی کے جاری منصوبوں میں حکومتِ سندھ کے ساتھ اپنا تکنیکی و مالی تعاون بھرپور انداز میں جاری رکھنے کے عزم کا اعادہ بھی کیا ہے۔