پاکستان اور کویت کا دوطرفہ شراکت داری کو مزید وسعت دینے پر اتفاق

پاکستان اور کویت کے دیرینہ برادرانہ تعلقات بڑھتی ہوئی غیر ملکی سرمایہ کاری اور باہمی اقتصادی تعاون کے ذریعے ترقی اور استحکام کی نئی بلندیوں کی جانب تیزی سے گامزن ہیں۔

وزیراعظم شہباز شریف کی کویتی ہم منصب سے ہونے والی اہم ملاقات میں دونوں برادر ممالک نے اپنے دیرینہ تعلقات کو مزید مضبوط اور مستحکم بنانے کے پختہ عزم کا اعادہ کیا ہے۔ اس اعلیٰ سطحی ملاقات کے موقع پر پاکستان اور کویت کے درمیان دوطرفہ اقتصادی تعاون بڑھانے اور سرمایہ کاری کے نئے مواقع تلاش کرنے پر بھی مکمل اتفاق کیا گیا۔

دوسری جانب توانائی کے شعبے میں ایک اہم سنگِ میل عبور کرتے ہوئے پاکستان اسٹیٹ آئل (پی ایس او) اور کویت پٹرولیم کارپوریشن نے توانائی کے شعبے میں گزشتہ 50 سال سے جاری اپنی تاریخی شراکت داری کو مزید وسعت دینے کا فیصلہ کیا ہے۔ طے پانے والے معاہدے کے تحت پاکستان کے توانائی کے شعبے کی پائیدار ترقی کے لیے ایندھن کی بلا تعطل فراہمی، ریفائننگ کی صلاحیت میں اضافے اور مشترکہ سرمایہ کاری کے نئے مواقع تلاش کیے جائیں گے، جبکہ توانائی کے دیگر ذیلی شعبوں میں بھی باہمی تعاون کو مزید فروغ دیا جائے گا۔

اقتصادی حلقوں کی جانب سے پاکستان میں توانائی، آئل اسٹوریج اور بنیادی ڈھانچے (انفراسٹرکچر) کے شعبوں میں کویتی سرمایہ کاری کے حوالے سے اس پیش رفت کو انتہائی اہم قرار دیا جا رہا ہے۔ توقع کی جا رہی ہے کہ پاک کویت اقتصادی شراکت داری میں اس اضافے سے نہ صرف ملک میں براہِ راست بیرونی سرمایہ کاری کے نئے مواقع پیدا ہوں گے بلکہ دونوں ممالک کے تجارتی اور معاشی تعلقات بھی مزید مضبوط ہوں گے۔