رواں مالی سال این ایف سی ایوارڈ کے تحت صوبوں کو 1 ہزار 895 ارب روپے منتقل

رواں مالی سال کی پہلی سہ ماہی (جولائی تا ستمبر) کے دوران وفاقی حکومت نے نیشنل فنانس کمیشن (این ایف سی) ایوارڈ کے تحت چاروں صوبوں کو مجموعی طور پر 1 ہزار 895 ارب روپے منتقل کیے ہیں، جس کے نتیجے میں پنجاب، سندھ اور خیبرپختونخوا نے بجٹ سرپلس ریکارڈ کیا جبکہ بلوچستان کو بجٹ خسارے کا سامنا کرنا پڑا۔

وفاقی وزارتِ خزانہ کی جانب سے جاری کردہ سرکاری دستاویزات کے مطابق مالی سال کی پہلی سہ ماہی میں وفاق کی جانب سے سب سے بڑا حصہ پنجاب کو دیا گیا، جسے این ایف سی ایوارڈ کے تحت 942 ارب روپے منتقل کیے گئے۔ اس عرصے میں پنجاب کی مجموعی آمدن 1 ہزار 117 ارب روپے رہی جبکہ صوبائی اخراجات 784 ارب روپے ریکارڈ کیے گئے، اس طرح پنجاب نے جولائی سے ستمبر کے دوران 333 ارب روپے کا نمایاں بجٹ سرپلس ظاہر کیا۔

وزارتِ خزانہ کی دستاویزات کے مطابق سندھ کو این ایف سی ایوارڈ کے تحت 479 ارب روپے منتقل کیے گئے۔ پہلی سہ ماہی میں صوبہ سندھ کی مجموعی آمدن 690 ارب روپے اور اخراجات 509 ارب روپے رہے، جس کے نتیجے میں سندھ نے 180 ارب روپے کا بجٹ سرپلس حاصل کیا۔

اسی طرح خیبرپختونخوا کو این ایف سی ایوارڈ کے تحت 314 ارب روپے فراہم کیے گئے، جہاں صوبے کی مجموعی آمدن 413 ارب روپے جبکہ اخراجات 311 ارب روپے ریکارڈ ہوئے، یوں خیبرپختونخوا نے جولائی تا ستمبر کے دوران 102 ارب روپے کا بجٹ سرپلس دیا۔

دوسری جانب وزارتِ خزانہ کے اعداد و شمار کے مطابق بلوچستان کو پہلی سہ ماہی میں این ایف سی ایوارڈ کے تحت 158 ارب روپے منتقل کیے گئے۔ اس دوران صوبے کی مجموعی آمدن 175 ارب روپے رہی جبکہ اخراجات 191 ارب روپے تک پہنچ گئے، جس کے باعث بلوچستان کو پہلی سہ ماہی کے دوران 16 ارب روپے کے بجٹ خسارے کا سامنا کرنا پڑا۔

مجموعی طور پر وزارتِ خزانہ کی رپورٹ کے مطابق رواں مالی سال کی پہلی سہ ماہی میں تین صوبوں پنجاب، سندھ اور خیبرپختونخوا کی مالی کارکردگی مثبت رہی اور انہوں نے بجٹ سرپلس ریکارڈ کیا، جبکہ بلوچستان کا بجٹ بیلنس خسارے میں رہا۔