خیبرپختونخوا کے 8 بالائی اضلاع موسم سرما کے دوران حساس قرار

خیبرپختونخوا کے 8 بالائی اضلاع کو رواں موسم سرما کے دوران شدید موسمی اثرات کے پیش نظر حساس قرار دے دیا گیا ہے، جن میں اپر چترال، لوئر چترال، اپر دیر، لوئر دیر، بونیر، سوات، اپر کوہستان اور لوئر کوہستان کے اضلاع شامل ہیں۔

ڈائریکٹر جنرل پراونشل ڈیزاسٹر مینجمنٹ اتھارٹی (ڈی جی پی ڈی ایم اے) کے مطابق رواں موسم سرما کے دوران صوبے کے بالائی اضلاع میں معمول سے زیادہ بارشوں اور شدید برف باری کا امکان ظاہر کیا گیا ہے، جس کے باعث ان پہاڑی علاقوں کی اہم شاہراہیں اور رابطہ سڑکیں بند ہونے کا خدشہ بھی موجود ہے۔

ممکنہ ہنگامی صورتحال اور قدرتی آفات سے مؤثر انداز میں نمٹنے کے لیے پی ڈی ایم اے مکمل طور پر متحرک ہے، جبکہ ادارے کی جانب سے موسم سرما کے لیے ایک جامع حفاظتی اور ہنگامی منصوبہ (ونٹر کنٹی جنسی پلان) بھی تیار کر لیا گیا ہے۔

ڈی جی پی ڈی ایم اے کا کہنا ہے کہ برف باری سے متاثر ہونے والے علاقوں میں بروقت امدادی سرگرمیوں اور سڑکوں کی بحالی کے لیے تمام پیشگی انتظامات مکمل کر لیے گئے ہیں۔ انہوں نے یقین دہانی کرائی کہ موسم سرما کے دوران عوام کے جان و مال کے تحفظ اور متاثرین کو بروقت امداد کی فراہمی ہر صورت یقینی بنائی جائے گی، جبکہ اس سلسلے میں تمام متعلقہ ضلعی و صوبائی اداروں کو بھی ہائی الرٹ رہنے کی باضابطہ ہدایت جاری کر دی گئی ہے۔

Headline: