ارجہ بازار باغ کے تاجروں کا فسادی جتھے سے لاتعلقی کا اعلان، پاکستان مخالف بیانیہ مسترد

علاقے میں امن و امان کی صورتحال خراب کرنے اور ریاست مخالف سرگرمیوں میں ملوث ہونے کے باعث مختلف طبقات کی جانب سے فسادی جتھے سے لاتعلقی کے اظہار کا سلسلہ تیزی سے جاری ہے۔

اس سلسلے میں ارجہ بازار باغ ٹریڈ یونین کے تاجروں نے ایک اہم پریس کانفرنس کرتے ہوئے واضح کیا کہ ابتدا میں انہوں نے حقوق کی پرامن تحریک سمجھ کر اس جتھے کا ساتھ دیا تھا، تاہم 5 جون کے واقعات کے بعد اس کے اصل عزائم اور طرزِ عمل سے تمام حقیقت کھل کر سامنے آ گئی ہے۔

پریس کانفرنس سے خطاب کرتے ہوئے تاجر رہنماؤں نے انکشاف کیا کہ فسادی جتھے کے شرپسند عناصر نے بندوق کے زور پر عام شہریوں کو جلوسوں میں شرکت کرنے پر مجبور کیا اور معصوم لوگوں کو ریاست کے خلاف ورغلایا۔ تاجر رہنماؤں نے دوٹوک الفاظ میں کہا کہ پاکستان اور اس کے ریاستی ادارے ہماری حفاظت اور خطے میں امن و استحکام کے ضامن ہیں، لہٰذا ان کے خلاف کسی بھی قسم کے اشتعال انگیز اور منفی بیانیے کی بھرپور مذمت کرتے ہیں۔

تاجروں نے دوٹوک اعلان کیا کہ ارجہ بازار میں آئندہ اس مسلح اور فسادی جتھے کی کسی بھی کال پر نہ تو کوئی ہڑتال ہو گی اور نہ ہی کسی احتجاج کی اجازت دی جائے گی، کیونکہ حقوق کے نام پر جاری ان انتشاری سرگرمیوں نے مقامی کاروبار، معیشت اور عام شہریوں کی روزمرہ زندگی کو شدید نقصان پہنچایا ہے۔