ٹرمپ فٹبال ورلڈ کپ فائنل دیکھنے جائیں گے: وائٹ ہاؤس

وائٹ ہاؤس کی پریس سیکرٹری کیرولین لیویٹ نے پریس بریفنگ کے دوران اعلان کیا ہے کہ امریکی صدر ڈونلڈ ٹرمپ فٹبال ورلڈ کپ کا فائنل میچ دیکھنے اسٹیڈیم جائیں گے۔ انہوں نے ٹورنامنٹ کی کامیابی کو سراہتے ہوئے کہا کہ رواں فٹبال ورلڈ کپ انتہائی کامیاب رہا ہے اور میچوں کے دوران شائقینِ کھیل کی آمد نے ماضی کے تمام ریکارڈ توڑ دیئے ہیں۔

نیوز بریفنگ کے دوران ایران کی صورتحال پر گفتگو کرتے ہوئے ترجمان وائٹ ہاؤس نے کہا کہ ایران کے ایک اسکول پر ہونے والے حملے سے متعلق تحقیقات جاری ہیں، تاہم انہوں نے واضح کیا کہ امریکی فوج کبھی بھی بچوں اور عام شہریوں کو نشانہ نہیں بناتی۔ کیرولین لیویٹ نے دعویٰ کیا کہ اس وقت ایران اور امریکا کے درمیان پسِ پردہ بات چیت کا سلسلہ جاری ہے اور ایران معاہدہ کرنے کا خواہش مند ہے۔

پریس سیکرٹری نے تہران پر الزام عائد کیا کہ ایران نے آبنائے ہرمز میں تجارتی جہازوں کو نشانہ بنا کر مفاہمتی یادداشت (MoU) کی سنگین خلاف ورزی کی ہے، جس کے ردِعمل میں حالیہ امریکی حملے کیے گئے۔ انہوں نے سخت موقف اپناتے ہوئے کہا کہ ایران کو کسی بھی صورت میں جوہری ہتھیار رکھنے کی اجازت نہیں دی جا سکتی اور اسے اپنے جارحانہ اقدامات کا خمیازہ بھگتنا ہوگا۔