ایران کے معاملے پر تمام آپشنز اب بھی موجود ہیں: وائٹ ہاؤس

وائٹ ہاؤس نے واضح کیا ہے کہ ایران کے معاملے پر امریکہ کے پاس تمام آپشنز اب بھی موجود ہیں۔ وائٹ ہاؤس کے ڈائریکٹر مواصلات سٹیون چونگ نے فاکس نیوز سے گفتگو کرتے ہوئے کہا کہ صدر ڈونلڈ ٹرمپ ہمیشہ سفارتی حل کو ترجیح دیتے ہیں، لیکن اگر ایران نے آبنائے ہرمز یا امریکی اتحادیوں کے خلاف شدت پسندانہ کارروائیاں جاری رکھیں تو تمام ردِعمل کے آپشنز برقرار رہیں گے۔

سٹیون چونگ نے مزید کہا کہ سخت اقتصادی پابندیوں اور ایران کے فوجی اہداف پر 13 روز تک جاری رہنے والے مسلسل حملوں کے بعد اب عقلمندانہ راستہ یہی ہے کہ ایران مذاکرات کی میز پر آئے، ورنہ وہ نتائج سے اچھی طرح واقف ہے۔ یہ بیان ان امریکی میڈیا رپورٹس کے بعد سامنے آیا ہے جن میں دعویٰ کیا گیا تھا کہ پیٹریاٹ میزائلوں کی کمی اور خلیجی اتحادیوں کے تحفظات کے باعث فی الحال مزید فوجی حملے روک دیے گئے ہیں۔

دوسری جانب، کشیدگی میں عارضی کمی کے آثار بھی دیکھے جا رہے ہیں۔ امریکی حملوں میں وقفے کے بعد ایرانی فوج نے بھی تصدیق کی ہے کہ انہوں نے اپنی جوابی کارروائیاں بند کر دی ہیں، تاہم وائٹ ہاؤس کے تازہ بیان سے ظاہر ہوتا ہے کہ خطے میں صورتحال اب بھی حساس اور تذبذب کا شکار ہے۔