چمن سیکٹر پر افغان جارحیت اور دراندازی کی کوشش ناکام، متعدد طالبان ہلاک

سکیورٹی ذرائع کے مطابق پاک افغان سرحدی علاقے میں چمن سیکٹر پر سکیورٹی فورسز نے افغان طالبان کی جانب سے دراندازی اور جارحیت کی کوشش کو بھرپور انداز میں ناکام بنا دیا ہے۔ اس بروقت اور مؤثر جوابی کارروائی کے نتیجے میں متعدد افغان طالبان ہلاک ہو گئے ہیں۔

ذرائع نے بتایا کہ افغانستان کی جانب سے چمن سیکٹر پر اشتعال انگیزی اور دراندازی کا ناپاک عزم ظاہر کیا گیا، جس پر پاک فوج نے انتہائی مستعدی کا مظاہرہ کرتے ہوئے فوری طور پر دشمن کی فائرنگ کا منہ توڑ جواب دیا۔ پاکستانی افواج نے زبردست جوابی کارروائی کرتے ہوئے جارحیت کرنے والی افغان طالبان رجیم کی پوسٹوں کو کواڈ کاپٹر اور مارٹر فائر کے ذریعے مکمل طور پر ملیا میٹ کر دیا، جس سے دراندازی کا پورا منصوبہ خاک میں مل گیا۔

سکیورٹی ذرائع نے عزم ظاہر کیا ہے کہ پاک افواج ملکی سرحدوں کے دفاع اور افغان سرزمین سے ہونے والی ہر قسم کی دراندازی کا بھرپور اور منہ توڑ جواب دینے کے لیے ہمہ وقت تیار ہیں۔ واضح رہے کہ اس سے قبل گلستان سیکٹر میں بھی سکیورٹی فورسز نے اسی نوعیت کی ایک اور دراندازی کی کوشش کو کامیابی سے ناکام بنایا تھا۔