پی ٹی آئی آج یا کل اسلام آباد مارچ ختم کرنے کا اعلان کردے گی: فیصل کریم کنڈی

گورنر خیبر پختونخوا فیصل کریم کنڈی نے کہا ہے کہ صوبے میں درپیش امن و امان کی خراب صورتحال کے پیشِ نظر گورنر راج کے نفاذ کے لیے مشاورت ہوئی ہے اور آئینِ پاکستان میں اس کی مکمل گنجائش موجود ہے۔ پشاور میں میڈیا سے گفتگو کرتے ہوئے انہوں نے واضح کیا کہ ملک میں ماضی میں بھی گورنر راج نافذ ہوتے رہے ہیں، لہٰذا یہ کوئی غیر آئینی اقدام نہیں ہے۔ انہوں نے صوبائی حکومت کو تنقید کا نشانہ بناتے ہوئے کہا کہ اس وقت خیبر پختونخوا میں کرپشن، لاقانونیت اور دہشت گردی کے واقعات میں تشویشناک حد تک اضافہ ہو چکا ہے۔

فیصل کریم کنڈی نے پاکستان تحریکِ انصاف (پی ٹی آئی) کے مجوزہ لانگ مارچ پر ردِعمل دیتے ہوئے دعویٰ کیا کہ پی ٹی آئی قیادت کے پاس مارچ کی کوئی عملی تیاری نہیں ہے اور ان کے لوگ اب راہِ فرار اختیار کر رہے ہیں، جس کی بنا پر وہ جلد لانگ مارچ ختم کرنے کا اعلان کر دیں گے۔ انہوں نے مزید کہا کہ پی ٹی آئی والے اسلام آباد پر چڑھائی کا دعویٰ تو کرتے ہیں لیکن دوسری جانب ان کے اپنے نمائندے خود گرفتاری دے رہے ہیں۔ گورنر کے پی نے صوبائی حکومت کے نئے پولیس ایکٹ سے متعلق تحفظات کا اظہار کرتے ہوئے کہا کہ صوبائی انتظامیہ پولیس فورس کو ‘ٹائیگر فورس’ بنانا چاہتی ہے تاکہ آئی جی، ڈی آئی جیز اور ڈی پی اوز کی تقرریاں ان کے اپنے ہاتھ میں رہیں، تاہم وہ اس قسم کی قانون سازی کی راہ میں رکاوٹ بنیں گے۔