یہ آخری کوشش ہوگی اور پی ٹی آئی پھر کبھی اسلام آباد کا رخ نہیں کرے گی: خواجہ آصف

وفاقی وزیرِ دفاع خواجہ آصف نے پاکستان تحریکِ انصاف (پی ٹی آئی) کے 27 ستمبر کے مجوزہ اسلام آباد مارچ پر سخت ردِعمل دیتے ہوئے کہا ہے کہ پی ٹی آئی رہنما اسلام آباد کو ‘سومنات کے مندر’ سے تشبیہ دے رہے ہیں، لیکن یہ ان کی آخری کوشش ثابت ہوگی اور اس کے بعد وہ اس طرف رخ کرنے کی ہمت نہیں کر سکیں گے۔ نیویارک میں اقوامِ متحدہ کی جنرل اسمبلی کے اجلاس کے موقع پر گفتگو کرتے ہوئے وزیرِ دفاع نے کہا کہ اسلام آباد ایک بڑی اسلامی اور ایٹمی ریاست کا دارالحکومت ہے، اور اب یہ ایک ‘فیصلہ کن معرکہ’ ہوگا۔ انہوں نے واضح کیا کہ وفاق اب اس قسم کے سیاسی انتشار کا بالکل متحمل نہیں ہو سکتا، اس لیے پی ٹی آئی کے اس اقدام کا سخت سے سخت جواب دیا جائے گا۔

یاد رہے کہ پی ٹی آئی کے کے پی صدر جنید اکبر کے “اسلام آباد کو سومنات بنانے” کے بیان اور وزیراعلیٰ سہیل آفریدی کے شدید ردِعمل کے انتباہ پر وفاقی وزرا نے اعلان کیا ہے کہ مظاہرین کو کسی صورت وفاقی دارالحکومت میں داخل نہیں ہونے دیا جائے گا۔ دوسری جانب، پی ٹی آئی کی سابق رہنما فوزیہ قصوری نے بھی اس رویے کی شدید الفاظ میں مذمت کرتے ہوئے کہا کہ احتجاج کے نام پر اسلام آباد پر چڑھائی یا ریاست اور افواج کے خلاف پروپیگنڈا کرنے والے پاکستان کے دوست نہیں ہو سکتے، اور اگر ان کے پاس کوئی عملی پالیسی ہے تو وہ اسے خیبرپختونخوا کی صوبائی حکومت کے ذریعے نافذ کر کے دکھائیں۔