اقوام متحدہ کا عالمی امن کیلئے پاکستان کی خدمات اور قربانیوں کا اعتراف

وزیراعظم محمد شہباز شریف نے نیویارک میں اقوامِ متحدہ کی جنرل اسمبلی کے 81ویں اجلاس کے موقع پر اقوامِ متحدہ کے سیکرٹری جنرل انتونیو گوتریس سے اہم ملاقات کی ہے۔ ملاقات کے دوران وزیراعظم نے کثیرالجہتی نظام (Multilateralism) اور اقوامِ متحدہ کے منشور کے اصولوں کے لیے پاکستان کے پختہ عزم کا اعادہ کرتے ہوئے عالمی امن و ترقی کے فروغ میں اس عالمی ادارے کے مرکزی کردار کی اہمیت پر زور دیا۔ انہوں نے سیکرٹری جنرل انتونیو گوتریس کی قیادت کو خراہِ تحسین پیش کیا اور انسانیت کی بہتری کے لیے ان کے اقدامات کو سراہا۔

ملاقات میں دونوں رہنماؤں نے مشرقِ وسطیٰ کی سنگین صورتحال سمیت دیگر اہم علاقائی و عالمی امور پر تفصیلی تبادلہ خیال کیا۔ وزیراعظم نے فلسطینی عوام کے حقِ خودارادیت اور آزاد فلسطینی ریاست کے قیام کے لیے پاکستان کی غیر متزلزل حمایت کو دہرایا۔ اس کے علاوہ، وزیراعظم نے اسلاموفوبیا کے بڑھتے ہوئے رجحانات، بالخصوص خطے میں اس کے اثرات پر تشویش کا اظہار کرتے ہوئے عالمی سطح پر مؤثر اقدامات پر زور دیا۔ دونوں رہنماؤں نے افغانستان کی موجودہ صورتحال اور افغان سرزمین سے ہونے والی دہشت گردی میں اضافے پر بھی گفتگو کی۔ سیکرٹری جنرل انتونیو گوتریس نے اقوامِ متحدہ میں پاکستان کی مؤثر آواز، عالمی امن و سلامتی کے لیے خدمات اور بالخصوص دہشت گردی کے خلاف جنگ میں پاکستان کی قربانیوں کا اعتراف کرتے ہوئے ملک کے مثبت سفارتی کردار کی تعریف کی۔