عباس عراقچی کی روسی وزیر خارجہ سے ملاقات، تنازع کے سفارتی حل پر زور

روسی وزیرِ خارجہ سرگئی لاوروف اور ایرانی وزیرِ خارجہ عباس عراقچی نے نیویارک میں اقوامِ متحدہ کی جنرل اسمبلی کے 81ویں اجلاس کے موقع پر ایک اہم ملاقات کی، جس میں دونوں رہنماؤ نے ایران کے گرد پیدا ہونے والے حالیہ تنازع کو سیاسی و سفارتی ذرائع سے حل کرنے پر زور دیا۔ ملاقات کے دوران دونوں وزرائے خارجہ نے متفقہ طور پر واضح کیا کہ موجودہ بحران کا کوئی متبادل فوجی حل نہیں ہے اور خطے میں پائیدار امن کے قیام کے لیے صرف اور صرف مذاکرات کی راہ ہی اختیار کی جانی چاہیے۔

روسی وزارتِ خارجہ کی جانب سے جاری کردہ رسمی بیان کے مطابق ملاقات کے دوران مشرقِ وسطیٰ کی مجموعی صورتحال اور عالمی سلامتی کے چیلنجز پر تفصیلی تبادلہ خیال کیا گیا، جبکہ ایران سے متعلق معاشی و عسکری پیش رفت خصوصی طور پر زیرِ بحث آئی۔ ماسکو نے اپنے بیان میں مشرقِ وسطیٰ کے حالیہ بحران کو امریکہ اور اسرائیل کے غیر قانونی اقدامات سے منسلک کرتے ہوئے ان کی سخت مذمت کی اور اس عزم کا اعادہ کیا کہ روس خطے میں کشیدگی میں کمی اور تمام سیاسی و دفاعی اختلافات کو سفارتی سطح پر حل کرنے کی کوششوں کی حمایت جاری رکھے گا۔