وانا کیڈٹ کالج میں تمام طلبا اور اساتذہ بحفاظت ریسکیو

پشاور: وانا کیڈٹ کالج پر حملہ کرنے والے دہشت گردوں کے خلاف سیکیورٹی فورسز کا آپریشن جاری ہے۔ سیکیورٹی ذرائع کے مطابق سیکیورٹی فورسز نے دلیرانہ کارروائی کرتے ہوئے کالج میں موجود تمام طلبا اور اساتذہ کو بحفاظت ریسکیو کرلیا۔

ذرائع کا کہنا ہے کہ اب آپریشن جامع طریقے سے حتمی انجام تک پہنچایا جائے گا اور آخری دہشت گرد کے خاتمے تک کارروائی جاری رہے گی۔ تمام طلبا اور اساتذہ کے حوصلے بلند ہیں۔

طالبعلموں نے کہا کہ بزدل دہشت گرد چاہتے تھے کہ ہم تعلیم سے محروم رہیں لیکن دہشت گردوں نے آج پھر کوشش کی اور ہمیشہ کی طرح ناکام رہے۔ طلبا نے کہا کہ پاک فوج نے ہماری حفاظت کی، الحمدللہ تمام کیڈٹس محفوظ ہیں۔

سیکیورٹی ذرائع کے مطابق دہشت گردوں نے بارود سے بھری گاڑی کے ذریعے کالج پر حملہ کیا، جس سے مرکزی گیٹ تباہ ہوا۔ تاہم سیکیورٹی فورسز نے فوری کارروائی کرتے ہوئے شرپسندوں کو ہلاک کردیا۔