واہگہ بارڈر پر پرچم اتارنے کی تقریب، پاکستان زندہ باد کے فلک شگاف نعرے

واہگہ بارڈر پر یومِ آزادی کے موقع پر پرچم اتارنے کی روایتی اور پروقار تقریب کا انعقاد کیا گیا، جس میں شہریوں نے بچوں، بزرگوں اور خواتین سمیت کثیر تعداد میں شرکت کی۔ تقریب کا باقاعدہ آغاز قومی ترانے سے ہوا، جس کے دوران پنڈال میں موجود عوام ہاتھوں میں سبزرنگ کے قومی پرچم تھامے انتہائی جوش و خروش کا مظاہرہ کرتے رہے۔ فضا دن بھر ملی نغموں، ‘نعرہ تکبیر’، ‘پاکستان زندہ باد’ اور ‘پاک فوج زندہ باد’ کے فلک شگاف نعروں سے گونجتی رہی۔

پاکستان رینجرز کے شیر دل جوانوں کی ولولہ انگیز اور روایتی پریڈ نے حاضرین کے جذبہ حب الوطنی کو مزید جلا بخشی۔ اس بار رینجرز کے دستے میں خواتین اہلکار بھی شامل تھیں، جن کے چاق و چوبند انداز اور قدموں کی دھمک نے شائقین کا لہو گرمائے رکھا۔ پنڈال میں موجود عوام نے رینجرز سپاہیوں کی اس شاندار اور جاندار پریڈ کو دیکھ کر تالیاں بجا کر ان کی حوصلہ افزائی کی اور ملکی سلامتی کے لیے ان کے جذبوں کو بھرپور خراجِ تحسین پیش کیا۔