روس کو ہتھیار دے کر ایران پہلے ہی جنگ میں شامل ہو چکا ہے: زیلنسکی

یوکرینی صدر ولودومیر زیلنسکی نے الزام عائد کیا ہے کہ ایران روس کو ہتھیار اور شاہد ڈرونز فراہم کر کے یوکرین کے خلاف جنگ میں پہلے ہی باقاعدہ شامل ہو چکا ہے۔ ایک انٹرویو کے دوران ممکنہ نئے خطرات اور حملوں کے حوالے سے گفتگو کرتے ہوئے زیلنسکی نے کہا کہ ہمیں ہر وقت محتاط رہنا ہوگا تاکہ کوئی نیا محاذ نہ کھل سکے۔ انہوں نے کہا کہ حقیقت یہی ہے کہ ایران اور شمالی کوریا پہلے ہی ان پر حملہ آور ہو چکے ہیں، اور اگرچہ امید ہے کہ وہ اپنے حملوں کی شدت میں مزید اضافہ نہیں کریں گے، تاہم یوکرین کو ہر ممکنہ صورتحال کے لیے تیار رہنا ہوگا۔ صدر زیلنسکی کے مطابق ایران نے جنگ کے آغاز ہی سے روس کو ہزاروں شاہد ڈرونز فراہم کیے اور بعد میں ان کی مقامی سطح پر تیاری کے لائسنس بھی دیے، جس سے اس کی جنگ میں براہِ راست شمولیت ثابت ہوتی ہے۔